মুখ্য পৃষ্ঠা
06/04/2515:15
স্বদেশৰ স্বাধীনতা বিচাৰি
নৈ খনৰ পাৰৰ লুংলুঙিয়া আলি তোৰে ,
মোৰ সঘন আহ-যাহ |
প্ৰশ্ন কৰে বহুতেই
তুমি কিয় এই বাটেৰে আহা ?
উত্তৰত থাকে মাথো নীৰৱতা |
তেওঁলোকক বুজাওঁ কিদৰে ,
নৈ খনৰ সিপাৰে আছে মোৰ স্বদেশৰ
স্বাধীনতা |
বিধৱা আইৰ কাতৰ আৰ্তনাদ |
শব্দৰ মায়াত বন্দী মোৰ জীৱন
কিম্বা যৌৱন |
সেয়েই শব্দ বিচাৰি যাওঁ ,
নৈ খনৰ সিপাৰে |
দুভাগ ৰাতি যেতিয়া উলটি আহো ,
বুকুত বাৰুদ থৈ প্ৰশ্ন কৰে স্বাধীনতাই
|
মাথো নীৰৱতাৰ মাজেৰে দিওঁ সেই
উত্তৰ |
নীৰৱতাত থাকে মোৰ প্ৰিয় শব্দৰ
কবিতা |
তেওঁলোকে নাজানে ,
অথবা তেওঁলোকে বুজিও নুবুজে
কিয় মোৰ এই নীৰৱতা ?
স্বদেশৰ বাকৰিত কেঁচা তেজৰ
শলিতা জ্বলাই ,
হাজাৰ স্বহীদ আজি আছে শুই |
হায় !!
মাটিৰ চাকি গচিৰ হালধীয়া পোহৰত ,
আয়ে তধা লাগি চাই মুখলৈ |
ভাগৰত
কোঙা হৈ যোৱা মানুহটো দেখি
আয়ে হয়তো বুজে ,
অসম্পুৰ্ণ আজিও মোৰ এটি শব্দৰ
কবিতা |
বাৰুদৰ শব্দত পৰাধীন আজিও ,
মোৰ স্বদেশ |
অথবা বিধৱা আইৰ কান্দোনৰ ৰোল |
দোকমোকালিতে আকৌ খোজ লওঁ
সিপাৰলৈ ,
কিজানি বিচাৰি পাওঁ
দেশৰ স্বাধীনতাৰ ৰম্যভূমিত
বুকুত সাহস লৈ শ্বহীদ হোৱা
মোৰ পিতাইৰ মৃতদেহ |
© ৰাজু কলিতা
10/08/14
